Nú nærkast 1. sunnudagur í advent og tíðin er komin til eyka heimligan hugna❤️ Hesa leskiligu kaffi karamel køku uppskriftina hevur Birita Olsen givið okkum.😊  Birita er búsitandi í Vági og fæst nógv við bakstur í frítíðini. Vangin hjá Biritu á sosialu miðlunum, eitur Bibi’s Cakery, her ber til at síggja alskyns køkur, alt frá muffum, dópskøkum og brúðarkøkum.

Cookiebotnur:

Smelta smørið í eini grýtu og tak av hitanum. Lat farin og sukur í og rør væl. Píska síðani eggið í. Lat síðani mjøl, bakipulvur og salt í og píska til deiggið hevur samlað seg. Lat sjokolátuna í og rør.

Koyr deiggið í ein form á 24 cm við bakipapír í botninum og baka í 22-24 min. á 180 stigum luft. Lat kølna,  legg ein tallerk (20 cm) á botnin og sker kantarnar burtur, (hetta tí kantarnir ofta vera so harðir, tá botnurin er kólnaður.) Set botnin á køl.

 

Marengsskúm:

Lat sukur, glukosesirop, vatn og vaniljusukur í eina grýtu og set at kóka. Í meðan sukurlakin kókar, píska so eggjahvítan stívan. Tá eggjahvítin hevur samlað seg, koyr eina spsk av sukur í og píska víðari. Lat sukurlakan kóka uppá 118 stig og koyr síðani sukurlakan í eggjahvítarnir í eini tunnari strálu eftir kantinum á bollanum. Píska væl og leingi til skúmið er orduliga fast.😊

Smyr skúmið javnt á botnin, men tað er ikki neyðugt at brúka alt skúmið.
Koyr botnin á køl ella í frystiboksina, til hann skal brúkast.

 

 Kaffi-karamel mousse

Bloyt husblas í køldum vatni í 10 minuttir. Smelta sjokulátuna í mikroovni samstundis sum tú hitar 1 dl róma  í grýtu til beint undir kókipunktið. Píska ímeðan 3 dl róma og 1,5 dl vaniljukrem saman. Ikki orduliga stívt, men bara soleiðis, at tað samlar seg.
Upploys kaffi í hitaða rómanum, smelta síðani husblasið í. Stoyt síðani heita róman útyvir smeltaðu sjokulátuna og rør runt. Tá sjokulátan og rómin hava samlað seg, letur tú eitt lítið sindur av pískaða rómanum í sjokulátuna, rør runt. Ger hetta tvær-tríggjar ferðir, áðrenn alt verður blandað saman. Umráðandi er, at tað ikki verður pískað saman, men vend varðisliga við einum spartli, so alt samlast.

 

Tak frysta botnin upp og legg hann á serveringsfat. Tak ein springform/”justerbar” á 24-25 cm, klæð við køkuplasti framvið kantinum. Springformurin skal vera størri enn botnurin, sum er meiningin.
Ansa eftir, at mousse ikki er ov flótandi, tá stoytast skal útyvir botnin, so tað ikki rennur ímillum formin og køkufatið. Um tað er so, stilla síðani mousse á køl eina løtu, so tað stívnar eitt sindur. Hetta má metast um áðrenn stoytt verður útyvir botnin.
Stoyt mousse yvir botnin, set á køl í minst 4-6 tímar ella frost í 2-4 tímar. Tað er eisini møguligt at gera hesa køkuna ”upside-down” í silikonuformi, tá skal køkan frystast í min 5-6 tímar.

Tá køkan hevur staðið á køl/frost, tak formin og køkuplasti av og pynta eftir ynski. Gull hóskar seg væl til karamelfarvaða mousse, men bert hugflogið setur markið.

Vælgagnist!😊

 

Kaffi-karamel køka

Køka til 12-15 fólk

 

Cookiebotnur:

100 g Raska smør

120 g farin

110 g sukur

1 egg

1 tsk salt

140 g mjøl

1 tsk bakipulvur

90 g GOLD sjokuláta

 

Marengsskúm:

90 g sukur

45 g glukosesirop

30 g vatn

1 tsk vaniljusukur

60 g eggjahvítar

1 spsk sukur

 

Kaffi-karamel mousse

6 husblas

285 g GOLD-sjokulátu

1 dl Raska róma

3 tsk instant kaffi

3 dl Raska róma

1,5 dl Raska vaniljukrem